DAVAO DEL SUR- Giangkon sa amahan sa bosingerong si Nesthy Petecio nga nakabati kini og kabalaka sa bag-ohay lamang niini nga dula sa nagpadayong Paris Olympics 2024.
Sa pakighinabi sa Bombo Radyo Davao sa amahan ni Nesthy nga si Teodoro Petecio, gikanayon niini nga namatikdan niya ang biases nga gipakita sa referee atol sa maong dula rason nga nakabati siya og kaguol.
Kini alayon na usab sa gikabutyag nga kaagi ni Nesthy Petecio sa usa ka interview nga sa pagsulod pa lamang niini sa maong lugar, syagit nga France na ang iyang nadungog inay nga madunggan ang pangalan sa nasud Pilipinas.
Apan bisan paman niini, wala kini nahimong babag sa pagpaningkamot ug pagtoo ni Nesthy nga makab-ot gihapon ang kadaogan.
Sumala pa sa amahan sa atleta, masaligon siya sa ginapakita nga atake sa iyang anak ug proud usab kaayo siya sa pag abante ni Nesthy sa Quarter Finals.
Kahinumduman nga miabanse ang atleta sa Round of 16 sa Women’s 57kg division human nga gipildi si Amina Zidani nga gikan nasud France.
Ning kasamtangan, malaumon ang pamilya ni Nesthy sa Davao del Sur nga makauli kini og medalya sa nasud Pilipinas.
Samtang nanawagan usab ang amahan niini og pag-ampo sa mga Pinoy aron nga matagaan og kahigayonan si Nesthy.
