Gi-uppercut sa usa ka anak ang iyahang kaugalingong amahan, rason nga nakabsan kini sa kinabuhi pasado alas 5 ang takna sa hapon sa Barangay Centro, Lungsod sa Tubigon, Bohol.
Giila ang biktima nga si Santos Leria, 48 anyos, samtang giila sab ang suspek nga maoy anak sa biktima nga si John Herbert Leria, 27 anyos, nga susamang nagpuyo sa naasoyng baranggay.
Sumala pa ni PSSg. Christian Ombahin gikan sa Tubigon Police Station, nga ayha pa man ang maong panghitabo, aduna na sumala pay lalis ang mag-amahan.
Giakusahan sa suspek ang iyahang amahan nga buot sumala pa niining pagawason ang babae nga barkada sa iyahang namatay nga igsuon, nga sa karon kasamtangang nagpuyo sa ilahang panimalay.
Apan sa dihang mitubag ang amahan og “pasagdan na lang” kalit nga nasuko si John Herbert ug usa ka panghunat nga uppercut ang gipatugpa sa dagway sa iyahang amahan, hinungdan sa pagkatumba sa biktima.
Gumikan sa kusog nga pagka-uppercut, nasayran nga aduna nay blood clot ang amahan sa ulo, rason nga pipila ka oras ang milabay, nakabsan na kini sa kinabuhi.
Dali sab nga nadakpan ang suspek. Sa karun, padayon pa ang ginalusad nga imbestigasyon labot sa maong panghitabo.
