DAVAO CITY – Lig-on ang basehan ug ebidensiya sa kapulisan aron nga pasakahan ug kaso ang usa ka amahan nga napulo ka higayon nga milugos sa iyang kaugalingon nga anak sa milabay nga walo ka mga katuigan.
Kahinumduman nga wala na naka-antos ang 16 anyos nga si alyas Jessa, residente sa Baguio District ning siyudad sa gihimo kaniya sa iyang kaugalingon nga amahan hinungdan nga nagpatala na kini sa iyang reklamo sa kapulisan.
Sumala sa biktima nagsugod ang pagpanglugos kaniya sa iyang amahan nga si alyas Romeo, 57 anyos kaniadtong nag-edad pa lamang siya ug otso anyos ug nayagyag lamang kini niining milabay nga adlaw.
Gikanayong nahunong lamang ang pagpangmolestiya kaniya kaniadtong milabay nga tuig 2015. Gipahibalo sumala pa sa biktima ang iyang gidangatan ngadto sa iyang inahan hinungdan nga nagpatala sila sa kapulisan.
Hinuon mitahan ang suspek sa barangay kapitan sa Baguio District ug mi-angkon kini sa iyang salaud nga nahimo. Dihang gipailalom sa eksaminasyon ang biktima sa Southern Philippines Medical Center ang biktima, positibo sumala pa kini nga nahilabtan pinasikad sa resulta sa medico legal.
Nagpabilin karon sa presohan sa Baguio District PNP ang akusado ug desidido ang kabanay sa biktima nga pasakahan kini ug kaso.
