Daghan ang nalipay sa mga nanan-aw sa Miami Open human nga nasorpresa sila sa pagdaog ni Pinay tennis ace Alex Eala batok sa World Number 5 nga si Madison Keys gikan sa US sa ikatulong round.
Nakuha sa 19-anyos nga si Eala ang iskor nga 6-4, 6-2 aron makasulod sa round of 16. Siya ang unang Pinay sa Open Era nga nakapildi og top-10 nga kontra sukad ipatuman ang ranking system niadtong 1975. Ang maong kadaugan nahitabo pipila ka adlaw human niyang mapildi si World Number 25 Jelena Ostapenko sa ikaduhang round sa torneo.
Sa pagsugod pa lang sa duwa, agresibo na si Eala ug nagpadayon ang iyang pag-atake batok sa American tennis player. Mapasalamaton si Eala sa iyang pamilya ug sa mga Filipino nga misuporta ug mitan-aw sa iyang duwa.
Sunod niyang makaatbang ang World Number 10 nga si Paula Badosa gikan sa Spain.
