Natala sa Philippine Institute of Volcanology and Seismology (Phivolcs) ang usa ka ash emission ug 38 ka linog palibot sa Bulkang Kanlaon sulod lamang sa nakalabay nga 24 ka oras.
Sumala pa sa report karong kagahapong adlawa, mikabat og 29 ka minutos ang pagbuga sa abo nga misaka hangtod 1,200 metros ang gitas-on.
Mikabat sab sa 1,609 ka tonelada ang gibugang sulfur dioxide sa bulkan. Usa ka volcanic tremor ang lakip sa 38 ka linog nga na-monitor sa Phivolcs, ug nagpabilin nga naka-inflate ang kabukiran sa bulkan, diin usa ka timail-han sa nagpadayon nga kalihukan sa ilawom sa yuta.
Una nang gibutyag nga nagpabilin sa Alert Level 3 ang Bulkang Kanlaon, nga nagpasabot nga aduna’y taas nga lebel sa volcanic unrest.
Samtang, nagpagula og pahimangno ang Phivolcs batok sa posibleng kalit nga pagbuto, pag-ulan og abo, pyroclastic density currents, ug pagkabahinbahin sa lahar hilabi na kon kusog ang ulan.
Gihisgutan usab nga gitugotan na ang daytime entry sa extended 6-kilometer danger zone sukad niadtong Mayo 31.
Bisan pa man, hugot gihapon nga girekomenda sa Phivolcs ang dali nga evacuation sa sulod sa 6 kilometer radius gikan sa tumoy sa bulkan ug ang pagdili sa bisan unsang kalihukan sa kasikbit nga dapit niini.
