Mangilngil nga aksidente ang nahitabo sa Davao-Bukidnon Highway, Sitio Talisay, Barangay Suawan, Marilog District, Davao City, pasado alas-9 sa buntag, Oktubre 27, diin usa ka inahan ang namatay samtang ang iyang anak ug duha ka menor de edad naangol.
Giila ang biktima nga si Rosita Olivar, 50-anyos, ug ang iyang 11-anyos nga anak nga si Angel, mga residente sa Happy Village, Suawan.
Base sa imbestigasyon, duha ka menor de edad nga nagmaneho ug nag-angkas sa usa ka motorsiklo gikan Agdao paingon sa Calinan ang nakabangga sa mag-inahan nga mitabok sa highway.
Tungod sa kusog nga impact, nalamba ang mag-inahan ug naangol usab ang duha ka menor de edad nga sakay sa motor.
Gidala dayon sa Barangay Talomo River Response Team ang tanan nga biktima sa ospital, apan napatay si Rosita pag-abot sa Adventist Hospital, samtang padayon nga ginatambalan sa SPMC ang iyang anak.
Ang duha ka menor de edad nga sakay sa motor gidala sa Isaac Robillo Hospital ug karon anaa na sa kustodiya sa kapulisan alang sa tukmang disposisyon.
Nagpadayon ang imbestigasyon sa Davao City Police Office aron tukion ang posibleng kaso batok sa mga menor de edad nga nalambigit sa maong disgrasya.
