Giklaro sa Environmental Management Bureau sa DENR Region XI nga nagpabiling luwas ug maayo ang kalidad sa hangin sa tibuok Davao Region bisan pa sa pagbuto sa Mt. Kanlaon sa Negros Occidental. Ang pahayag gibase sa pinakabag-ong air quality monitoring nga ilang gihimo kagahapon sa pipila ka lugar sa rehiyon.
Sumala pa sa Environmental Management Bureua (EMB XI) nga ang mga resulta sa ilang monitoring gikan sa Davao International Airport, Calinan National High School, ug Tagum National High School nagpabilin sa “good” level sa air quality index. Nagpasabot kini nga walay hulga sa kahimsog sa publiko ug padayon nga normal ang kondisyon sa hangin sa maong mga lugar.
Gipasabot usab sa buhatan nga base sa advisory nga gipagula sa DOST-PHIVOLCS, ang abo gikan sa pagbuto sa Mt. Kanlaon nagapadayon lang sulod sa palibot sa bulkan ug dili kini dako ang posibilidad nga makaabot sa Davao Region. Busa gihangyo sa EMB ang publiko nga magpabilin nga kalmado ug magpahimangno sa mga opisyal nga pahibalo.
