Gipadayag sa Armed Forces of the Philippines nga dili sila mohunong sa ilang regular nga patrolya sa West Philippine Sea, bisan pa sa padayon nga mga sulti ug reklamo gikan sa China. Klaro ang baruganan sa militar nga ang ilang presensya sa maong dapit legal ug kabahin sa pagpanalipod sa katungod sa Pilipinas.
Sumala sa AFP, ang kasamok ug tensiyon sa West Philippine Sea dili tungod sa presensya sa Pilipinas, kondili sa padayon nga lihok sa China nga ilang gihulagway nga walay basehan sa balaod. Giingon sa militar nga ang West Philippine Sea sakop sa exclusive economic zone sa nasud, busa may katungod ang Pilipinas sa pagbantay ug pagpatrolya niini.
Gipasabot usab nga ang mga kalihokan sa AFP, lakip ang mga training ug patrolya sa Bajo de Masinloc, klarong planado, gi-aprubahan, ug nahiuyon sa mga kasabutan ug ginapatuman nga balaod, lokal man o internasyonal. Wala kini gihimo nga tago o kalit, ug giila kini isip normal nga buhat sa usa ka nasud nga nagpanalipod sa iyang teritoryo.
Laing punto nga gipasiugda sa AFP mao nga dili lang ang Pilipinas ang nakaagi sa susamang buhat gikan sa China. Matod pa nila, adunay rekord nga ang maong mga lihok nasangkapan sa paglapas sa katungod sa ubang mga nasud sa Southeast Asia, ug usahay supak usab sa internasyonal nga balaod sa dagat.
Bisan pa sa bag-ong naval ug air patrols nga gihimo sa China sa maong waters sulod sa pipila ka adlaw, gipahayag sa AFP nga kini walay koordinasyon sa Pilipinas ug walay lig-on nga ligal nga basehan. Para sa militar, kini nga mga lihok nagdugang lang sa kalisang ug tensiyon sa rehiyon.
Sa katapusan, gipamatuod sa AFP nga magpabilin silang alerto ug lig-on ang baruganan. Ang ilang tumong, matod pa, mao ang pagpanalipod sa soberanya sa nasud ug pagsiguro nga ang katungod sa Pilipinas sa West Philippine Sea mapadayon alang sa karon ug sa umaabot nga henerasyon.
