Gisaway sa Armed Forces of the Philippines (AFP) ang Southern Theater Command sa China human sa joint military exercises sa Pilipinas kauban ang Estados Unidos ug Canada sa West Philippine Sea (WPS).
Gipahayag ni AFP spokesperson Colonel Francel Padilla, nga ang Pilipinas ang dili manghilabot sa teritoryo sa ubang kanasuran apan ipaglaban lamang ang kaugalingon niini nga soberenya ug teritoryo nga nakabutang sa international law.
Ang nahimo nga pahayag sa opisyal ang isip tubag sa mga pamahayag ni Tian Junli, tigpamaba sa Southern Theater Command sa China nga nagkanayon nga ang Pilipinas ang misulay sa pagtabon sa matud pa iligal nga lakang niini sa rehiyon ug nagpasamot lamang sa tensyon pinaagi sa military provocations ug media hype.
Gipasabot pa ni Col. Padilla nga dili expansionist ang mga pinoy ug wala usab kini nanghilabot sa teritoryo sa uban nga kanasuran.
Gihisgutan usab niini ang desisyon sa Permanent Court of Arbitration kaniadtong 2016 nga mibasura sa halapad nga pag-angkon sa China sa WPS ug giila ang mga katungod sa Pilipinas sa Exclusive Economic Zone (EEZ) niini.
Ang WPS mao ang kadagatan nga nakapalibot sa Kalayaan Island Group ug Bajo de Masinloc (Scarborough Shoal) ug kabahin kini sa EEZ sa Pilipinas.
Kahinumduman, gihisgutan ni AFP Chief General Romeo Brawner Jr. nga tumong sa pagbansay-bansay mao ang pagpakita sa hiniusang saad aron suportahan ang usa ka gawasnon ug abre nga Indo-Pacific.
