Gikondena pag-ayo sa Armed Forces of the Philippines (AFP) ang pagbaliktad ug tinguha nga pagpakatag pag-usab sa usa ka daan nga video nila kanhing House Speaker Martin Romualdez ug kanhing Appropriations Chair Zaldy Co, diin ilahang gihisgutan ang pagsaka sa subsistence allowance sa mga sundalo gikan ₱150 ngadto ₱350.
Sa maong video nga nakuha niadtong Disyembre 11, 2024, ang adlaw nga giaprubahan sa Kongreso ang pagtsaka sa allowance makita nga nag-video call sila Co ug Romualdez kang AFP Chief of Staff General Romeo Brawner Jr.
Apan sa usa ka pahayag, giklaro sa Armadong Kusog nga kini nga panag-istorya adunay kalabotan sa reporma nga gihangyo ni Brawner kang President Ferdinand Marcos Jr. alang sa dugay na kaayong gipaabot nga pagsaka sa subsistence allowance sa AFP personnel.
Nahitabo kini human personal nga nangutana ang Pangulo kang Gen. Brawner niadtong Disyembre 2023 kung unsaon niya pagtabang sa mga sundalo, ug dinhi gihangyo sa AFP Chief ang umento sa allowance tungod dili na igo ang ₱150 matag adlaw alang sa pagkaon sa mga tropa.
Apan, gibutyag sa AFP nga kini gigamit ug gituis sa mga nagtinguhang magpahugaw sa kahimtang aron ipakita nga ang AFP sumala pa “napalit,” “gikontrola,” o “na-kompromiso.”
Gibarugan sa AFP nga walay kamatuoran ang maong naratibo ug usa kini ka insulto sa mga sundalo.
Walay nahitabong political bargaining, walay bayloay og pabor, ug walay nalapas nga integridad sa institusyon.
Giklaro usab sa AFP nga wala kini napailalom sa bisan kinsang personalidad sa politika ug nagapabiling natinud-anon sa Konstitusyon ug sa katawhan.
Sumala pa ni Brawner nga makatarunganon ang dugang nga ₱200 allowance tungod dugay na kaayo kining gihulat nga suporta alang sa mga sundalo.
Dugang pa sa AFP, adunay pipila ka grupo nga iresponsableng naggamit sa daang video aron magpakaylap og pagduda ug destabilisasyon, busa nagpahimangno kini sa mga nagapadagan sa sayop nga naratibo nga undangon ang pagbira sa AFP sa political theatrics.
Sa katapusan, giinsistir sa AFP nga dili gayud mabayran ang dignidad ug integridad sa mga sundalong Pilipino.
