Gibarugan sa Armed Forces of the Philippines (AFP) nga dili kini manghilabot sa mga panagbangi sa pulitika taliwala sa alegasyon ni Senadora Imee Marcos nga naggamit daw og iligal nga droga ang iyang igsuon nga si Pangulong Ferdinand Marcos Jr.
Sumala pa ni Acting AFP Spokesperson Rear Admiral Roy Vincent Trinidad, ang pamahayag sa Senadora usa ka isyung politikal nga angay resolbahon sa husto nga institusyon ug dili sa publiko.
Kahinumdoman nga gihimo sa Senadora ang maong akusasyon atubangan sa iyang talumpati sa anti-corruption protest sa Iglesia Ni Cristo (INC) sa Quirino Grandstand niadtong Lunes diin iyang gitumbok nga sumala pa adik sa iligal nga droga ang Pangulo, usa ka pahayag nga gitawag dayon sa Malacañang nga desperado nga lakang alang sa political ambition sa Senadora.
Samtang, sa dihang gipangutana kini bahin sa alegasyon ug sa bag-ong panawagan sa pipila ka grupo nga i-withdraw sa militar ang suporta sa Pangulo nga nagsilbi nga Commander-in-Chief, gipadayag pag-usab sa AFP nga dili kini magpagamit sa bisan kinsa.
Mibarug si Rear Adm. Trinidad nga nagpadayon nga propesyonal, disiplinado, ug non-partisan ang Sandatahang Lakas ug nakatutok sa Konstitusyon ug sa siguridad sa nasod.
