DAVAO CITY – Gibakwi na sa Presidente sa Ateneo De Davao University (ADDU) ang suporta niini sa kagamhanan, labot sa gubat batok sa illegal nga druga.
Sumala pa kang ADDU President Joel Tabora, SJ miuyon siya kaniadto sa war on drugs sa kagamhanan gumikan kay bout niya nga mapugngan ang kadaut nga hatud sa illegal nga druga.
Karong desmayado na si Father Tabora gumikan kay nakita niini nga wala masunod ang balaod sa pagpitol sa mga drug suspek.
Sa iyang blog, nga giulohan ug Choosing Hell With Duterte and Heaven with CBCP, gipahayag ni Tabora nga pili-on niya ang langit uban sa CBCP, inay nga makauban si Duterte sa Impierno.
Gi-angkon ni Tabora nga giboto niya kaniadto si Duterte, apan wala na kini maka-uyon sa bag-ong mga panghitabo nga daw sama na sa Ginoo ang presidente nga mohukom kung kinsa ang pagapatyon ug kinsa ang angayan nga buhi-on.
Sa pastoral letter gihinaway sab sa CBCP ang anti-narcotics crackdown sa kagamhanan.
Gibarugan sa CBCP nga dili sulbad sa suliran sa illegal nga druga ang mga pagpatay nga daw terror attack sa mga kabus nga katawhan.
