Gipamugos sa abogado ni dismissed Bamban, Tarlac Mayor Alice Guo, nga si Atty. Stephen David nga nagpabilin pa gihapon kuno sa Pilipinas ang iyahang kliyente.
Matod pa sa abogado, nahinabi niini si Guo niadtong adlawng lunes, Agusto 19 ug gipahayag niini kaniya nga nagpabilin pa gihapon kini sa nasud.
Apan bisan paman niini, giankon sa abogado nga dili niini makumperma ang inpormasyon ug wala kini ideya kung asa na ang mayor. Dugang pa niini nga ang migawas nga report mamahimong adunay basihanan ang mga nahisgutan, apan alang kaniya, nahinabi niini ang kliyente ug nagkanayon kini kaniya nga nagpabilin pa kini sa nasud.
Gipaneguro pa sa kliyente nga 100% anaa kini sa Pilipinas hinungdan nga ang gipahayag ni Senator Risa Hontiveros, lisod kining ma-uyunan.
Kung kahinumduman, gipahayag ni Hontiveros niadtong milabay nga adlaw nga si Guo nga giila usab isip Chinese national nga si Guo Hua Ping ang mibiya kuno sa nasud niadtong Hulyo 18 padulong sa Kuala Lumpur, Malaysia.
Samtang gipahayag usab sa Presidential Anti-Organized Crime Commission (PAOCC) mibiya sa nasud ang gipalagpot nga mayor ug nakahimo na sa pagbyahe sa dili mo-ubos sa tulo ka nasud sa Southeast Asia ug ang katapusan mao ang Indonesia.
Samtang gipahayag ni Immigration Commissioner Norman Tansingco, gihisgutan ang intelligence information nga si Guo ang migawas sa nasud nga wala mi-agi sa Philippine immigration authorities.
Isip bugti, gihagit sa legal ang mga awtoridad nga ipakita ang video ni Guo kung nakagawas gayod kini sa nasud.
Apan nagtuo kini nga mugawas pa gihapon si Guo sa insaktong panahon sa higayong mamatikdan niini nga luwas na ang nahisgutan.
Nagtuo usab ang nahisgutang abogado sa integridad ni Atty. Elmer Galicia nga matod pa nag-notaryo sa counter affidavit ni Guo sa dihang personal niining gibisita niadtong Agusto 14 sa San Jose Del Monte City, Bulacan.
Ang counter affidavit mao ang tubag sa qualified human trafficking complaint nga gipasaka batok kang Guo nga adunay kalabutan sa girondang Philippine Overseas Gaming Operator (POGO) hub sa iyahang lokalidad kung diin mosobra sa 800 ka mga foreign nationals ang naluwas.
