Nagduso og resolusyon si Manila 6th District Representative Bienvenido “Benny” Abante aron ipahigayon ang imbestigasyon sa Kamara kabahin sa kaso sa mga namissing nga mga sabungero, nga iyang gihulagway nga “usa ka makabag-ong horror story.”
Sumala kang Abante, ang maong isyu angay nga husayon sa House Quad Committee, ilabi na nga ang mga personahe nalambigit sa mga pagpatay sa sabungero giingong konektado usab sa mga extrajudicial killings nga adunay kalambigitan sa drug war.
Gibutyag sa kongresista nga supak siya kaniadto sa pagtukod sa Manila Arena sa iyang distrito usa sa mga sentro sa e-sabong bisan wala pa ang mga kaso sa nahanaw nga sabungero.
Gilatid sa iyang resolusyon ang mga pasangil ni whistleblower Julie Patidongan, nga nagtudlo sa negosyanteng si Charlie “Atong” Ang nga siya kuno ang nagmando sa pagpamatay sa mga nahanaw nga sabungero.
Gibutyag usab ni Abante nga ang anggulong giluwatan ni Justice Secretary Crispin Remulla nga posibleng adunay kalabutan ang Davao Death Squad (DDS) sa mga pagkahanaw ug pagpatay nga sumala pa sa opisyal kinahanglan masusi pag-ayo.
Tungod niini, plano ni Abante nga hangyoon ang House Quad Committee nga subling ipatawag ug mag-convene sa Cogressional session karong 20th Congress aron tutukan ang maong seryosong isyu.
