Gikonsiderar sa Korte Suprema nga uyon sa Konstitusyon ang unprogrammed appropriations isip pamaagi aron mahatagan og pagka-flexible ang gobyerno sa paggasto sa pondo, apan nagtakda kini og hugot nga mga limitasyon sa paggamit niini.
Tungod niini, gipawalay-bisa sa kataas-taasang hukmanan ang dugang nga P449.5 bilyon nga unprogrammed appropriations sa 2024 national budget, lakip ang P17.992 bilyon nga gidugang sa 2025 Special Road Fund.
Giklaro sa Korte Suprema nga dili awtomatikong supak sa Konstitusyon ang tanang unprogrammed funds, apan dili kini mahimong gamiton aron malusotan ang mga restriksiyon sa Konstitusyon sa paggasto sa pondo sa publiko.
Ubos sa operative fact doctrine, magpabiling balido ang mga proyektong nahuman o naipatuman na kung ang mga benepisyaryo milihok nga may maayong pagtuo o good faith.
Gipunting usab sa hukmanan nga ang Presidente ang nag-andam sa national budget, samtang ang Kongreso ang nag-aprobar ug naggahin sa pondo sulod sa mga limitasyong gitakda sa Konstitusyon.
Samtang, giklaro ni Supreme Court Spokesperson Atty. Camille Ting nga dili pa pinal ug executory ang desisyon, tungod kay adunay 15 ka adlaw ang mga partido aron mosumite og motion for reconsideration o hangyo nga usbon pag-usab sa Korte ang desisyon.
