Gikansela sa Commission on Elections (COMELEC) ang akreditasyon sa 50 ka party-list groups human mapakyas sa pagtuman sa mga rekisito sa pag-apil sa eleksyon ug sa gikinahanglang gidaghanon sa boto ubos sa party-list system.Pormal nga gipatuman sa poll body ang pagkansela pinaagi sa Resolution No. 11281 nga gipagawas niadtong Oktubre 15.
Sakop niini ang mga organisasyon ug koalisyon nga wala miapil sa duha ka sunod-sunod nga eleksyon o napakyas sa pagkuha sa igong boto aron makakuha og puwesto sa Kongreso.Napulo sa mga grupo ang gikansela tungod kay wala gyud miapil sa kataposang duha ka eleksyon.
Lakip usab sa laing 40 ka grupo nga gikansela ang rehistrasyon ang Bayan Muna, Magdalo Para sa Pilipino, Buhay Hayaan Yumabong (BUHAY), Rebolusyonaryong Alyansang Makabansa (RAM), ug BOSES Party-list, nga nailhan kaniadto isip MOCHA.
Gibase sa COMELEC ang maong lakang sa Republic Act No. 7941 o Party-List System Act, ug COMELEC Resolution No. 11204. Ubos sa Section 6(8) sa maong balaod, adunay gahum ang COMELEC sa pagkansela sa rehistrasyon sa usa ka party-list group human sa pahibalo ug hearing kon napakyas kini sa pag-apil sa duha ka kataposang eleksyon o wala makakuha sa gikinahanglang porsiyento sa boto.
