Magpatuman og full alert status ang Philippine National Police (PNP) sa tibuok nasod sugod Oktubre 30 hangtod Nobyembre 2 isip pagpangandam sa pagsaulog sa All Saints’ Day ug All Souls’ Day o Undas.
Tumong niini nga masiguro ang kalinaw ug kahapsay sa pagbiyahe sa mga molawig pauli sa ilang mga probinsya, ingon man ang pagbisita sa publiko sa nagkadaiyang sementeryo.
Sumala ni PCol. Allen Rae Co, hepe sa Public Information Office sa PNP, magpakalat ang kapulisan og 72,501 ka pulis aron magbantay ug magpatuman sa seguridad sa nagkadaiyang lugar sa nasod.
Dugang niini, mokabat sa hapit 17,000 ka personnel gikan sa Armed Forces of the Philippines (AFP), Philippine Coast Guard (PCG) ug ubang ahensya sa gobyerno ang motabang sa pagpalig-on sa seguridad.
Nakig-alayon na usab ang PNP sa nagkadaiyang lokal nga panggamhanan aron masiguro ang hapsay nga pagpatuman sa mga lakang sa seguridad panahon sa Undas.
