Miabot sa Task Force Alpha o ikaunom nga alarma ang sunog nga miulbo sa Sitio Bakal, Barangay Leon Garcia, Agdao, Davao City, Huwebes sa gabii, Oktubre 15, 2026, sa wala pa kini gikumpirmang “fire under control” bandang alas 8:49 sa gabii.
Gikumpirma ni Fire Senior Inspector (FSINSP) Frances Marie S. Sendrijas, spokesperson sa Davao City Fire District (DCFD) sa Bureau of Fire Protection (BFP), nga anaa na sa Task Force Alpha ang sunog, nga nagpasabot sa pagresponde sa 24 ka fire truck aron tabangan ang pagpakgang sa kalayo.
Sa unang bahin sa insidente, miabot sa ikalimang alarma ang sunog bandang alas 7:26 sa gabii, samtang paspas nga mikaylap ang kalayo sa maong lugar.
Tungod sa nagpadayong pag-ulbo sa kalayo, nag-iyahay og alsa ang mga residente sa ilang mga gamit aron ibalhin sa mas luwas nga dapit. Padayon usab ang pag-abot sa dugang mga fire truck aron maghatag og tubig ug refill alang sa operasyon sa kabomberohan.
Gisabayan usab og ulan ang sunog samtang nagpadayon ang mga bombero sa pagpakgang niini. Sa samang higayon, nagresponde ang Central 911 ug mga rescue team aron susihon ug beripikahon kon aduna bay mga samdan o naangol sa maong insidente.
Bandang alas 8:49 sa gabii, gikumpirma sa DCFD-BFP nga “fire under control” na ang sunog human sa kapin upat ka oras nga operasyon sa pagpakgang niini.
