Miabot sa gatusan ka milyon nga piso ang kantidad sa pinsala sa sektor sa agrikultura sa Davao Region tungod sa El Niño phenomenon. Base sa datos sa Department of Agriculture Region XI o DA-XI, mikabat sa 2,027 ka mag-uuma ang naapektuhan sa wala pa ideklarang nagsugod ang El Niño niadtong Abril, diin miabot sa 1,291.71 ka ektarya ang gilapdon sa mga apektadong uma ug gibanabanang 713 milyong piso ang kantidad sa pinsala.
Sumala kang Office of Civil Defense Region XI Director Ednar Dayanghirang, misaka pa ang gidaghanon sa mga apektadong mag-uuma ngadto sa 4,447 samtang miabot sa 4,790.65 ka ektarya ang gilapdon sa mga uma nga nadaot sa misamot nga epekto sa El Niño. Bisan pa niini, 454 milyong piso ang natala nga kantidad sa pinsala sa maong panahon, diin ang humay ang giila nga pinakagrabeng naapektuhang pananom.
Samtang, padayon ang koordinasyon sa OCD uban sa mga local government unit o LGU, sa pakigtambayayong sa Department of the Interior and Local Government o DILG, aron mamonitor ang sitwasyon ug matino ang mga panginahanglan sa matag barangay. Sa Davao City, gihuman na usab sa Sangguniang Panlungsod ang usa ka resolusyon alang sa pagtukod og agricultural task force nga motutok sa mga lakang aron mapagaan ang epekto sa El Niño ug mapalig-on ang kapasidad sa mga panimalay sa pagsiguro sa ilang panginahanglan sa pagkaon.
