Gipasidunggan sa 10th Infantry (Agila) Division sa Philippine Army ang 78 ka mga personahe sa Civilian Armed Forces Geographical Unit (CAFGU) Active Auxiliary o CAA pinaagi sa paghatag kanila og separation gratuity pay ug pag-integrate sa Reserve Force ,kagahapon, Oktubre 12, 2026.
Lakip sa 78 ka mga CAA personnel ang lima ka indibidwal nga tagsa-tagsa nang nakaserbisyo sulod sa 38 ka tuig, nga nagpasiugda sa ilang dugayng dedikasyon sa pagserbisyo sa nasud. Sumala sa 10ID, importante ang papel sa mga CAA isip force multipliers sa kampanya batok sa insurgency ug sa pagpadayon sa kalinaw sa mga lugar nga napahimutang nang insurgency-free. Nagpadayon usab ang ilang kontribusyon isip Left Behind Forces sa mga geographically isolated and disadvantaged areas o GIDAs, diin ilang gisuportahan ang pagmintinar sa seguridad ug kalinaw sa mga komunidad. Dugang pa, adunay papel ang mga CAA sa pagpalig-on sa territorial defense, lakip na ang pagpataas sa kahibalo ug pagbantay sa mga komunidad sa kabaybayonan ug GIDAs batok sa mga hulga sa gawas sa nasud.
Bisan pa man sa pagtapos sa ilang aktibong serbisyo isip CAA, magpadayon gihapon ang ilang posibilidad nga makatampo sa nasud isip mga miyembro sa Philippine Army Reserve Force, ilabi na sa humanitarian assistance and disaster response, mga kalihokan alang sa kalinaw, ug suporta sa territorial defense operations kon gikinahanglan. Gipasabot usab sa 10th ID nga ang separation gratuity pay usa ka pag-ila sa ilang mga sakripisyo, dedikasyon ug kontribusyon sa misyon sa Hukbong Sandatahan sa Pilipinas.
