Nanawagan ang World Health Organization o WHO sa mga nasod sa tibuok kalibotan nga mobalhin gikan sa dugay nga pagpabilin sa mga pasyente sa psychiatric hospitals ngadto sa mas makatawo ug nakasentro sa komunidad nga mga serbisyo alang sa kahimsog sa pangisip.
Gipasiugda ni WHO Director-General Dr. Tedros Adhanom Ghebreyesus nga dili kinahanglan isakripisyo sa mga pasyente ang ilang kagawasan ug tawhanong katungod aron lamang makadawat sa gikinahanglang medikal nga pag-atiman.
Pinaagi sa bag-ong giya sa WHO, gihatagan og praktikal nga mga lakang ang mga lider sa mga pasilidad aron mamenosan ang dugay nga pagpabilin sa mga pasyente sa mga institusyon ug matabangan silang makabalik sa ilang komunidad.
Lakip sa mga girekomendar nga suporta ang angay nga kapuy-an, oportunidad sa trabaho ug tabang gikan sa pamilya aron mapadali ang ilang pagbalik sa naandang kinabuhi.
Dugang pa, giawhag sa WHO ang mga gobyerno nga dugangan ug paspason ang pagpamuhunan sa mga lokal nga programa sa kahimsog sa pangisip aron mas daghang pasyente ang makadawat og angay nga serbisyo duol sa ilang mga komunidad.
Base sa gipadayag sa WHO, siyam lamang ka porsiyento sa mga nasod ang hingpit nang mibalhin ngadto sa maong matang sa sistema sa pag-atiman.
Sa pagkakaron, padayon nga giduso sa WHO ang mas makatawo ug nakasentro sa tawo nga mga serbisyo sa mental health, diin gitahod ang kagawasan ug tawhanong katungod sa mga pasyente samtang gihatagan sila sa gikinahanglang suporta ug pagtambal.
