Pormal nang gitangtang sa House prosecution panel ang Article III o bribery charge batok kang Vice President Sara Duterte.Subay sa kumpirmasyin ni House prosecutor ug Manila Representative Joel Chua,napagdesisyunan na sa prosecution ang maong lakang kaniadtong miaging semana, human usab tangtangon si kanhi Senator Antonio “Sonny” Trillanes IV isip testigo sa maong kaso.
Sa pakighinabi sa Bombo Radyo Philippines kay Chua, gipasabot niini nga nakadesisyon ang prosecution nga dili na ipadayon ang bribery charge tungod kay nagtuo sila nga igo na ang mga ebidensyang ilang napresentar alang sa laing tulo ka impeachment charges.
Tumong usab sa maong lakang nga mapadali ang proceedings ug malikayan nga moabot sa sunod tuig ang impeachment trial.Padayon nga ipresentar sa prosecution ang mga testigo ug documentary evidence may kalabotan sa Article II, lakip ang mga isyu bahin sa giingong unexplained wealth ni Duterte.
Gisalikway ni Chua ang pagtan-aw nga ang pagtangtang sa bribery charge nagpasabot og kakulang sa ebidensya, ug gipasiugda nga mas gipili sa prosecution nga mahuman ang paglilitis sulod niining tuiga.
Gilauman usab nga magpagawas og opisyal nga pahayag ugma si Lead Prosecutor Representative Gerville Luistro bahin sa desisyon sa prosecution nga tangtangon ang bribery case.
