Giklaro sa Mati City Police Station o CPS nga theft o pagpangawat, ug dili robbery o pagpanulis, ang nahitabong insidente sulod sa usa ka fastfood chain sa Rizal Street, Barangay Central, Mati City, Davao Oriental niadtong alas-11 pasado sa buntag, Septiyembre 24, 2026.
Nasuta sa inisyal nga imbestigasyon sa kapulisan nga gibiyaan sa biktima, nga taga-Caraga, ang iyang bag samtang nag-order sulod sa establisyemento. Gikuha gilayon sa duha ka wala pa mailhing suspek ang maong bag ug misakay sa usa ka SUV aron makaikyas.
Nasubay sa kapulisan ang maong lihok pinaagi sa CCTV footage nga narekord sulod ug gawas sa fastfood chain, nga nahimong kabahin sa mga ebidensiyang gigamit sa inisyal nga imbestigasyon.
Samtang, gipahigayon na sa Mati CPS ang hot pursuit operation aron mailhan ug masubay ang mga suspek nga giingong responsable sa insidente. Gipasalig sa kapulisan nga palawmon pa ang imbestigasyon aron matino ang tanang kahimtang sa panghitabo ug makolekta ang dugang nga ebidensiya nga makatabang sa pag-ila sa mga responsable.
Sa pagkakaron, padayon ang hot pursuit operation sa mga otoridad samtang ilang gisubay ang posibleng agianan sa mga suspek human sa insidente.
