Gikuwestiyon ni Senator Joel Villanueva ang dakong pagkunhod sa pondo alang sa Universal Access to Quality Tertiary Education o UAQTE, ilawom sa gisugyot nga 2027 budget sa Commission on Higher Education o CHED ug mga state universities and colleges o SUCs.
Gipunting ni Villanueva nga mokunhod og ₱9.757 bilyon ang pondo sa UAQTE, gikan sa ₱37.547 bilyon karong 2026 ngadto sa ₱27.790 bilyon sa proposed 2027 budget.
Mas dako usab ang kinatibuk-ang pagkunhod sa pondo sa CHED, nga gikan sa ₱48.369 bilyon karong tuig ngadto sa ₱35.453 bilyon sa gisugyot nga alokasyon alang sa 2027.
Gipasiugda sa senador ang panginahanglan nga masiguro ang igong pondo alang sa pagpatuman sa Republic Act No. 12325, nga nag-amendar sa Universal Access to Quality Tertiary Education Act ug nagtumong sa mas tukmang paghatag sa mga subsidy ngadto sa mga estudyanteng mas nanginahanglan.
Gipunting usab ni Villanueva nga gamay pa ang bahin sa mga benepisyaryo sa Tertiary Education Subsidy o TES nga gikan sa mga pamilyang benepisyaryo sa Pantawid Pamilyang Pilipino Program o 4Ps.
Sa unang semestre sa Academic Year 2025-2026, anaa lamang sa 12.6 porsyento ang TES grantees nga gikan sa 4Ps households.
Samtang, adunay mga programa sa CHED nga makadawat og dugang nga pondo sa 2027, lakip ang Student Financial Assistance Programs, nga adunay gisugyot nga ₱3.185 bilyon gikan sa ₱2.154 bilyon karong tuig.
Pinaagi niini, gilauman nga mosaka gikan sa 42,128 ngadto sa 49,243 ang gidaghanon sa mga estudyanteng mahimong benepisyaryo.
Dugang pa, madugangan usab ang pondo alang sa Doktor Para sa Bayan o Medical Scholarship and Return Service Program, nga adunay gisugyot nga ₱1.232 bilyon alang sa 2027.
Gikatakda kining mosuporta sa 4,557 ka continuing scholars ug 700 ka bag-ong medical students.Matud ni Villanueva, bisan og adunay pagtaas sa pondo alang sa scholarship ug financial assistance programs, nagpabilin ang panginahanglan nga masiguro ang igong alokasyon aron hapsay nga mapatuman ang mga reporma sa tertiary education.
