Gipa-subpoena na sa Senate Impeachment Court si Davao City Mayor Sebastian “Baste” Duterte aron motestigo sa impeachment trial sa iyang igsuon nga si Vice President Sara Duterte.
Gilauman sa House Prosecution Panel nga motambong si Mayor Baste sa pagdungog, diin pangutan-on siya kabahin sa mga transaksiyon sa Davao City Government ug Gencorp Industries Inc., usa sa mga kompanyang nade klarar nga adunay financial interest ang bise presidente sa iyang SALN.
Sumala kang House Impeachment Panel Spokesperson Rep. Zia Alonto Adiong, may kalabotan ang testimonya ni Mayor Baste sa iyang personal ug opisyal nga kahibalo isip mayor sa Davao City atol sa panahon nga ginasusi sa prosekusyon ang maong mga transaksiyon.
Dugang pa, plano sa prosecution panel nga mangayo sa impeachment court nga ideklarar si Mayor Baste isip hostile witness, apan magdepende gihapon kini sa pag-apruba sa Senate Impeachment Court.
Lakip sa mga dokumentong gipangayo kang Mayor Baste ang mga rekord ug kontrata tali sa Davao City Government ug Gencorp, ingon man pipila ka mga transaksiyon sa siyudad nga sakop sa panahon nga iyang gipangulohan ang lokal nga gobyerno.
Gipatin-aw usab sa prosekusyon nga testigo si Mayor Baste ug dili respondent sa impeachment case, ug ang iyang pagtawag isip saksi dili tungod lamang sa iyang relasyon kang Vice President Sara Duterte.
Sa pagkakaron, naghulat ang impeachment court sa pag-atubang ni Mayor Baste alang sa iyang testimonya ug mga dokumentong may kalabotan sa mga transaksiyon nga ginatuki sa prosekusyon.
