Nagpahigayon og final coordination meeting ang Davao City Police Office o DCPO alang sa umaabot nga OPLAN KALINAW III sa Barangay Saloy, Calinan District.Gipangulohan ni PCOL Peter B. Madria, City Director sa DCPO, ang maong tigom aron masiguro ang hapsay nga pag-andam ug koordinasyon sa mga ahensya ug stakeholders nga moapil sa kalihokan.
Gipunting sa DCPO nga tumong sa programa ang pagpalig-on sa community-based programs pinaagi sa mas lig-on nga pakigtambayayong tali sa kapulisan, nagkalain-laing ahensya ug komunidad. Lakip sa mga serbisyo nga ipahigayon ang libreng medical check-up, PSA assistance, haircut, pag-apod-apod og tsinelas ug school supplies, farming seeds, anti-rabies vaccine, medisina, bitamina ug face masks.
Misalmot usab sa preparasyon ang Fraternal Order of Eagles, CSWDO, CDRRMO, BFP, 27th Infantry Battalion, DCPO Force Multipliers, RHQ-CSQMMH ug PSSO. Gilauman nga pinaagi sa maong kalihokan, mas mapaduol sa mga residente sa Barangay Saloy ang nagkalain-laing serbisyo nga ilang gikinahanglan.
Dugang pa, gitumong usab sa OPLAN KALINAW III nga mapalig-on ang relasyon tali sa kapulisan ug komunidad samtang gipadayon ang mga inisyatiba alang sa kalinaw ug seguridad.Sa pagkakaron, nagpadayon ang DCPO ug mga partner nga ahensya sa ilang koordinasyon aron masiguro ang hapsay nga pagpatuman sa programa.
