Nagsampa pag-usab ang Office of the Ombudsman og mga bag-ong kaso sa Sandiganbayan batok kang kanhi Ako Bicol Party-list Representative Zaldy Co ug pipila ka mga opisyal sa Department of Public Works and Highways o DPWH.
Gikumpirma sa Ombudsman nga gilakip sa maong mga kaso ang mga opisyal sa DPWH nga giingong nalambigit sa isyu nga giimbestigahan sa ahensya.
Sumala pa sa Ombudsman, giatubang sa mga akusado ang kaso sa paglapas sa Section 3(e) sa Republic Act No. 3019 o Anti-Graft and Corrupt Practices Act, lakip ang Malversation of Public Funds through Falsification of Public Documents.
Dugang pa niini, gisang-at ang mga kaso human nakit-an sa Ombudsman ang probable cause aron ipadayon ang pagpasaka og kaso batok sa mga hingtungdan.
Naglakip ang maong kaso sa giingong pagkalambigit nila sa P77-milyon nga flood control project sa Balagtas, Bulacan nga giingong adunay anomalya.
Samtang, apil unta sa mga pasakaan og kaso si kanhi Public Works Engineer Henry Alcantara, apan wala na kini kasuhi human maapil sa Witness Protection Program.
Sa kasamtangan, magpadayon ang proseso sa Sandiganbayan kalabot sa mga kaso nga gisang-at sa Ombudsman batok kang Co ug sa ubang mga akusado.
