Gikuwestiyon sa Office of the Ombudsman ang pagbiyahe ni Senador Loren Legarda ug ang padayong pagpabilin niini sa gawas sa nasod samtang nag-atubang og mga reklamo sa maong ahensya.
Gipahayag ni Assistant Ombudsman Atty. Mico Clavano nga dili malikayan nga magpatungha og mga pangutana ug pagduda ang pagbiyahe sa senadora ug ang iyang padayong pagpabilin sa gawas sa nasod.
Sumala pa ni Clavano, kung seryoso ang kondisyon sa panglawas ni Legarda, makiangay unta nga makapangayo kini og medical leave ug dili na balik-balik nga mangayo og extension.
Dugang pa niini, gihatagan usab og pagtagad sa Ombudsman ang kamatuoran nga wala sa nasod ang anak ni Legarda nga si Batangas 1st District Representative Leandro Leviste.
Nag-atubang og mga reklamong plunder, graft ug conflict of interest ang mag-inang Legarda ug Leviste sa Ombudsman nga may kalabotan sa usa ka solar firm nga konektado sa mga mambabalaud ug giingong napakyas sa pagtuman sa gisaad nga solar energy projects.
Gibutyag usab ni Clavano nga may kalabotan sa interes sa publiko ang maong mga reklamo, ilabi na tungod sa padayong pagsaka sa presyo sa kuryente.
Tungod niini, giawhag sa Ombudsman ang mag-inang mambabalaud nga tubagon ang mga pangutana ug hatagan og klarong katin-awan ang mga reklamo batok kanila.
Sa kasamtangan, gihangyo ni Clavano nga magpabilin una sa nasod ang mga hingtungdan ug likayan ang pagbiyahe gawas sa Pilipinas samtang nagpadayon ang proseso sa mga reklamo.
