Mipahayag si Senator Rodante Marcoleta human gibawi ni retired Marine Master Sergeant Orly Guteza ang iyang unang testimonya sa Senate Blue Ribbon Committee may kalabotan sa giingong anomalya sa mga proyekto sa flood control.
Kahinumduman nga niadtong Septiyembre 25, 2025, mitestigo si Guteza sa Senado ug misaysay sa iyang giingong personal nga kahibalo sa pagdala sa mga maleta nga giingong adunay dagkong kantidad sa kuwarta ug iyang gilangkit kang kanhi House Speaker Martin Romualdez.
Apan niadtong Agosto 19, 2026, gibawi ni Guteza ang maong testimonya ug giakusahan sila ni Marcoleta ug kanhi Congressman Mike Defensor nga giingong nag-coach kaniya aron mahimong maapil sa iyang pahayag si Romualdez.
Gipanghimakak usab ni Marcoleta ang maong alegasyon ug giingon nga wala siya nakigkunsabo kang Defensor ug Guteza.
Sumala pa sa senador, dili kuno katuohan nga makahimo sila og detalyado nga istorya kabahin sa pagdala sa mga maleta nga adunay kuwarta sulod lamang sa mubo nga panahon.
Dugang pa niini, giingon ni Marcoleta nga mas posible kuno nga napugos si Guteza sa pagpirma sa iyang bag-ong pahayag tungod sa giingong hulga sa kinabuhi o kagawasan sa iyang asawa ug mga anak.
Gipatin-aw hinuon nga ang alegasyon kabahin sa giingong hulga batok kang Guteza ug sa iyang pamilya pahayag lamang ni Marcoleta ug wala pa mapamatud-i.
Samtang, nanawagan si Marcoleta nga ipadayon ang pagpangita sa kamatuoran ug pagpanubag kabahin sa giingong iregularidad sa paggamit sa pondo alang sa mga proyekto sa flood control.
Sa pagkakaron, nagpabiling bahin sa kontrobersiya ang unang testimonya ni Guteza ug ang iyang ulahing pagbawi niini samtang nagpadayon ang pagtan-aw sa mga alegasyon kabahin sa flood control projects.
