Mikabat sa 154 ka fire outbreaks ang natala sa nagkalain-laing bahin sa Algeria, diin 12 ka tawo ang namatay ug 54 pa ang nasamdan tungod sa nagkadaiyang wildfire.
Sumala pa kang Interior Minister Said Sayoud, gikan sa mga probinsiya sa Jijel, Bejaia ug Tizi Ouzou ang mga nangamatay.
Gibisita usab ni Sayoud ang mga ospital diin gidala ang mga biktima, samtang gisusi ang kahimtang sa mga naapektuhan sa maong kalamidad.
Gituohang nakapasamot sa pagkaylap sa mga sunog ang grabeng heatwave nga nakaapekto sa Algeria ug silingang Tunisia.
Dugang pa niini, pipila ka libo ka residente ang gipabakwit gikan sa ilang mga pinuy-anan tungod sa hulga sa kalayo.
Sa kasamtangan, gipasalig sa gobyerno sa Algeria ang paghatag og tabang sa mga pamilyang nasunogan ug naapektuhan, samtang nagpadayon ang operasyon sa pagpugong sa pagkaylap sa wildfire.
