Gipadayag ni OVP special disbursing officer ug hostile witness Gina Acosta nga dili na niya mahinumdoman ang eksaktong alokasyon sa confidential funds sa Davao City atol sa iyang pagserbisyo isip SDO niadtong 2019 hangtod 2022.
Gihimo ni Acosta ang maong pahayag atol sa direct examination ni Atty. Amando Ligutan, counsel for prosecution, sa ika-17 nga adlaw sa impeachment trial ni Vice President Sara Duterte karong Lunes, Agosto 24.
Kahinumduman nga nagsilbi si Acosta isip SDO sa confidential funds ni Duterte sa panahon nga mayor pa kini sa Davao City gikan 2019 hangtod 2022.
Gipangutana ni Ligutan si Acosta kung nakadawat ba ang Davao City og P460 milyon nga confidential funds niadtong 2019, apan mitubag kini nga dili na niya mahinumdoman ang maong kantidad.
Dugang pa niini, giingon ni Acosta nga dugay na ang maong alokasyon ug nakaapekto usab ang iyang edad sa iyang paghinumdom sa eksaktong kantidad.
Gipakita usab ni Ligutan ang usa ka grapiko nga nagpakita nga nakadawat ang Davao City og P460 milyon nga confidential funds kada tuig gikan 2019 hangtod 2022.
Mao usab nga gipangutana pag-usab ni Ligutan si Acosta kung nakadawat ba ang siyudad og laing P460 milyon niadtong 2022, apan nagpabilin ang iyang tubag nga dili na niya kini mahinumdoman.
Sa kasamtangan, nagpadayon ang direct examination kang Acosta isip kabahin sa pagdungog sa mga alegasyon sa sayop nga paggamit sa confidential funds sa Office of the Vice President ug Department of Education ubos sa administrasyon ni VP Sara Duterte, nga dugay nang gilimod sa kampo sa depensa.
