Gipasaka na sa Bureau of Internal Revenue o BIR sa Department of Justice ang reklamong tax evasion batok sa Hongsheng Gaming Technology, Inc. nga mikabat sa P2.228 bilyon. Giatubang sa kompanya ang mga alegasyon sa underdeclaration sa kita, sayop nga deklarasyon sa value-added tax o VAT, ug kapakyasan sa pag-withhold ug pag-remit sa final withholding tax alang sa mga langyaw nga trabahante niini gikan taxable years 2021 hangtod 2023.
Gipakita sa imbestigasyon ug mga rekord gikan sa nagkalain-laing ahensya sa gobyerno ang dakong kalainan sa ideklarang kita sa Hongsheng kumpara sa opisyal nga mga tala, nga miresulta sa P2,227,759,311.21 nga deficiency tax liability. Sumala pa ni BIR Commissioner Charlito Martin R. Mendoza, padayon nilang panalipdan ang mga matinud-anong nagbayad og buhis batok sa tax evasion ug ipatuman ang balaod batok sa mga negosyong molikay sa ilang obligasyon sa gobyerno.
Dugang pa niini, kabahin sa Run After Tax Evaders o RATE Program sa BIR ang pagsaka sa maong kaso aron mas mapakusgan ang kampanya batok sa mga kalapasan sa buhis ug maprotektahan ang kita sa gobyerno. Sa pagkakaron, anaa na sa DOJ ang reklamo alang sa hustong aksyon ug pagproseso sa kaso.
