Gibarugan sa Iran nga magpabilin ubos sa ilang kontrol ang Strait of Hormuz bisan pa sa hulga ni United States President Donald Trump nga mahimo niyang ideklarar kini nga teritoryo sa Amerika.
Matod ni Iranian Deputy Foreign Minister Kazem Gharibabadi, iya sa Iran ang maong estratehikong agianan ug ang Tehran lamang ang adunay gahum sa pagdesisyon kung kanus-a kini ablihan o sirad-an.
Dugang pa ni Gharibabadi nga sa Iranian na ang Strait of Hormuz kaniadto pa, Iranian gihapon kini karon, ug magpabilin nga Iranian sa umaabot.
Una nang mipahayag si Trump sa usa ka political rally sa New York nga mahimo niyang angkonon ang Strait of Hormuz human kuno mapildi sa Estados Unidos ang Iran.
Importante ang Strait of Hormuz sa pangkalibotang trade sa lana tungod kay nagdugtong kini sa Persian Gulf ug Gulf of Oman.
Nagpabiling limitado ang pag-agi sa mga barko sa maong lugar human kini sirad-an sa Iran tungod sa misamot nga tensyon ug gubat sa Middle East.
