Gidepensahan ni House Lead Prosecutor Rep. Gerville Luistro ang online post ni Atty. Amando Ligutan bahin sa paggamit sa misleading questions atol sa impeachment hearing.
Gipatin-aw ni Luistro nga walay probisyon sa impeachment rules ang nalapas ni Ligutan tungod sa maong post, kay ang iyang komento, sumala pa niini, nagtutok lamang sa procedural nga aspeto sa kaso ug dili sa merito niini.
Gibutyag usab ni Luistro nga ang gidili ubos sa maong lagda mao ang pagkomento sa merito o sustansya sa kaso, ilabina sa mga isyu nga wala pa mahukmi sa mga senador nga nagsilbing impeachment judges.
Dugang pa niini, nangayo ang House panel og mas klarong giya gikan sa Senado bahin sa sub judice rule aron masiguro ang hugot ug makanunayon nga pagsunod sa maong lagda atol sa impeachment proceedings.
