Gipahibalo sa Embahada sa Amerika sa Pilipinas karong adlawa, Agosto 13, nga gipondohan sa Estados Unidos ang bag-ong maritime monitoring center sa Palawan nga mangolekta og mga report gikan sa mga Pilipinong mananagat bahin sa iligal nga pagpangisda ug mga kadudahang lihok sa mga barko.
Giablihan niadtong Hulyo 30 ang pasilidad o Community Illegal, Unreported and Unregulated Fishing Reporting Center pinaagi sa pakigtambayayong sa Palawan Council for Sustainable Development.
Sumala sa Embahada sa Amerika, gihatagan og kagamitan ang pasilidad og Starlink satellite internet ug EarthRanger data software. Kolektahon usab dinhi ang mga taho gikan sa lokal nga mga mananagat bahin sa mga kadudahang kalihokan sa iligal nga pagpangisda, lihok sa mga barko ug uban pang iligal nga kalihokan sa kadagatan, nga ipadala ngadto sa Bureau of Fisheries and Aquatic Resources (BFAR), National Maritime Center ug Provincial Government sa Palawan alang sa tukmang aksyon.
Gipangulohan ang maong sentro ubos sa Fish Right Program nga nagtutok sa pagpalig-on sa pagmonitor ug kahibalo sa mga kalihokan sa kadagatan, ingon man sa pagpalig-on sa estratehikong presensya sa Estados Unidos sa daghang natural nga bahandi sa dagat sa West Philippine Sea.
Sumala kang US Embassy officer Taylor Fincher, usa sa mga importanteng bahin sa kooperasyon tali sa Estados Unidos ug Pilipinas ang pag-atubang sa iligal nga pagpangisda ug uban pang mga isyu nga may kalabotan sa kadagatan.
