Gi-isyuhan og warrant of arrest sa Las Piñas Regional Trial Court (RTC) ang 18 ka kanhing bodyguard ni kanhing kongresista Zaldy Co, nga mas nailhan sa bansag nga “Maleta Boys.”
Sumala sa korte, giisyu ni Judge Kathryn Sabado ang maong warrant niadtong Martes may kalabotan sa upat ka kaso sa perjury nga giatubang sa matag usa kanila.
Dugang pa niini, gitakda ang piyansa sa ₱18,000 matag kaso, o mokabat sa ₱72,000 ang kinahanglang ibayad sa matag akusado aron makagawas sa temporaryong kagawasan.
Kahinumduman, 14 na lamang sa mga kanhing bodyguard ang padayon nga girepresentahan ni Atty. Levito Baligod human gibawi sa upat ang ilang unang gipanumpaang pahayag.
Samtang, mitambong sa korte ang kampo sa 14 ka akusado aron magpiyansa. Sumala pa, ang dili makabayad sulod sa gitakdang panahon mahimong dakpon sa Las Piñas PNP.
Nag-ugat ang mga kaso human sa giingong mga pahayag sa mga kanhing bodyguard nga naglambigit sa pipila ka opisyal sa gobyerno sa giingong anomalya sa mga flood control projects, diin matud pa nila adunay gidala nga mga maleta nga adunay sulod nga salapi isip giingong kickback.
Hinuon, gihimakak sa mga opisyal ang maong mga alegasyon ug misang-at usab og mga kontra-reklamo. Lakip sa mga nagpasaka sa reklamo sila House lawmaker Leila de Lima, kanhing Senador Antonio Trillanes IV, kanhing National Security Adviser Eduardo Año, ug BuCor Chief Gregorio Catapang Jr.
Sa kasamtangan, gawas sa mga kaso sa perjury sa Las Piñas, nag-atubang usab ang grupo ug ilang abogado og unom ka kaso sa cyber libel sa ubang mga korte sa Metro Manila tungod sa giingong pagpakaylap sa ilang mga alegasyon pinaagi sa social media ug mga press conference.
