Mikunhod ngadto sa 2.3 porsyento ang pagtubo sa ekonomiya sa Pilipinas o Gross Domestic Product (GDP) sa ikaduhang quarter sa 2026, base sa taho sa Philippine Statistics Authority (PSA) karung adlawa, Agosto 7, 2026.
Sumala sa PSA, mao kini ang pinakahinay nga pagtubo sa ekonomiya sa milabayng lima ka tuig, tungod sa epekto sa taas nga inflation, tensiyon sa Middle East, ug pagkunhod sa mga pamuhunan.
Sa usa ka press briefing, gibutyag ni PSA chief ug National Statistician Claire Dennis Mapa nga mas ubos ang 2.3 porsyentong GDP growth kumpara sa 2.8 porsyento nga natala sa unang quarter sa 2026.
Dugang pa niini, mas dako usab ang pagkunhod kumpara sa 5.4 porsyento nga pagtubo sa parehas nga panahon niadtong 2025.
Tungod sa hinay nga dagan sa ekonomiya, mikabat lamang sa 2.6 porsyento ang average growth sa ekonomiya sa unang unom ka bulan sa 2026.
Sa kasamtangan, gipaubos sa gobyerno ang target nga pagtubo sa ekonomiya alang sa tibuok tuig ngadto sa 3.5 hangtod 4.5 porsyento gikan sa mas taas nga una nga banabana tungod sa nagpadayon nga mga hagit sa ekonomiya.
