Hugot nga gilimod ni Metropolitan Manila Development Authority (MMDA) General Manager ug kanhi PNP Chief Nicolas Torre III ang mga migawas nga taho nga modagan kini isip alkalde sa Davao City.
“Para malinaw: wala akong sinabing tatakbo akong Mayor ng Davao. At wala rin akong inanunsyong pagtakbo sa anumang local o national position. Kaya huwag muna nating pangunahan ang kuwento. Marami pa tayong trabaho,” pagpasabot ni Torre sa iyang Facebook post karong adlawng Biyernes.
Gipasabot ni Torre nga nagsugod lamang ang tanan sa usa ka komento sa usa ka netizen sa social media.
Tungod niini, paspas nga mikatag ang maong estorya ug gihimong daw tinuod nga balita.
Matod pa, nakatutok siya karon sa iyang katungdanan sa MMDA ug gipasiugda nga ang pag-alagad sa katawhan dili kinahanglan hulaton pa ang eleksiyon.
Sa nangaging mga interbyu, gibutyag usab niini nga wala siyay igo nga pondo o pinansyal nga kapanguhaan aron mosulod sa politika.
Misikat pag-ayo ang ngalan ni Torre sa Davao City human niyang gikuwestiyon ang bilyon-bilyong pisong pondo alang sa mga flood control project sa siyudad, ilabina human mabahaan ang iyang kaugalingong balay didto.
Tungod niini, giaghat siya sa pipila ka mga grupo ug netizens nga mohagit sa pamilyang Duterte sa lokal nga eleksiyon.
Nagpahayag usab si Vice President Sara Duterte nga gawasnon ug giabiabi ang bisan kinsa, lakip si Torre, nga modagan sa ilang baluwarte.
Bisan pa niini, pormal nang gitapos ni Torre ang mga espekulasyon pinaagi sa iyang opisyal nga paglimod sa maong isyu.
