Gilauman nga motestigo sa Senado sila Special Disbursing Officers (SDOs) Gina Acosta ug Edward Fajarda may kalabotan sa giingong pagdumala ug pagbalhin sa confidential funds, sumala ni House lead prosecutor Rep. Gerville Luistro.
Sumala pa ni Luistro, hinungdanon ang ilang testimonya tungod kay sila ang direktang midumala sa mga pondong gi-withdraw pinaagi sa encashment sa wala pa kini itugyan ngadto sa mga security officer.
Dugang pa niini, gilaoman nga mahimong “unwilling” o “hostile” witnesses ang duha, apan naglaom siya nga magpabilin silang matinud-anon sa ilang mga pahayag nga gihatag ubos sa pagpanumpa.
Gipunting usab ni Luistro nga kinahanglan mapasabot sa mga SDO kung asa gayod padulong ang confidential funds human kini ma-withdraw, sanglit sila ang mga nag-unang saksi sa proseso sa pagdisburse ug pag-liquidate sa maong mga pondo.
Sa kasamtangan, gilaoman nga makatabang ang ilang testimonya sa pagpatin-aw sa mga isyung gipangutana may kalabotan sa paggamit sa confidential funds.
