Gibatikos ni Vice President Sara Duterte ang kahimtang sa journalism sa Pilipinas, nga iyang giingong layo pa sa kalidad sa international media, atol sa usa ka pakighinabi sa The Hague, human sa iyang pagbisita kang kanhi Pangulong Rodrigo Duterte.
Sumala pa sa Bise Presidente, mas organisado ug mas maampingon sa pagpangita ug pagpresentar sa balita ang mga international media kumpara sa pipila ka media outlets sa Pilipinas. Dugang pa niini, iyang gipahayag ang maong obserbasyon human siya pangutan-a mahitungod sa giingon niyang pagkuha sa pipila ka lokal nga media sa iyang mga pahayag nga wala sa hustong konteksto, nga matud pa niya nakahatag og negatibong pagtan-aw batok kaniya ug sa iyang pamilya.
Gipahayag usab niini, nga dili ang kuwarta ang angay mahimong nag-unang tumong sa pamahayag, tungod kay, matud pa niya, mahimong lisod ang pagpatuman og tinuod nga kausaban sa nasud kon mao lamang kini ang prayoridad. Lakip sa iyang gihisgutan ang papel sa social media, nga matud pa niya naghatag og higayon sa publiko nga makita ang nagkalain-laing panan-aw ug bersyon sa mga panghitabo.
Sa kasamtangan, nagpahayag usab si Duterte og kabalaka sa giingon niyang nag-usab nga mga prinsipyo sa pipila ka mga Pilipino ug nanawagan nga padayon nga ampingan ang mga mithi sama sa bayanihan, disiplina, ug kalig-on.
