Gilauman nga mapugngan na ang mga pagbaha nga nasinatian sa pipila ka bahin sa dakbayan sa dabaw sa higayon nga mahuman na ang kasamtangang gi-construct nga storm drainage project nga naa nahimutang sa Dacudao, Agdao ning syudad. Sa kasamtangan, panapos na lamang nga bahin sa konstruksiyon sa proyekto ang gihimo sa department od public works and highways, kung diin gilauman nga hingpit na kiniing matapus sa katapusan nga bahin sa bulan sa Agusto niining tuiga.
Ang maong proyekto nga nagkantidad og 83 million pesos ang gisugdan niadtong April 9, 2025 og gipaspasan na kini sa pagtrabaho aron makab-ot sa DPWH ang ilang target nga completion date. Kagahapong adlawa, personal nga gisuta ni DPWH sec Vinze Dizon ang maong proyekto aron masiguro nga ang mga sakyanan nga moagi ug ang mga residente sa maong dapit ang dili makasinati og tumang kahasol samtang gina-trabaho ang maong proyekto hangtud nga kini ang mahuman sa gikatakdang petsa.
Gipasalig usab ni Dizon nga walay igong rason aron malangay pa ang paghuman sa storm drainage project sanglit aduna kini supisyenting pundo gawas pa nga walay nahimong mga balda sa pagtrabaho niini. Ang maong proyekto ang gipundohan og mokabat sa ₱83,059,000 ilalom sa 2025 DPWH Infrastructure Program pinaagi sa General Appropriations Act. Kini ang gilangkuban sa konstruksiyon sa 290 linear meters sa double-barrel drainage, 110 linear meters sa dugang nga double-barrel drainage ug ang pag-limpyo sa 200 linear meters sa existing lateral drainage.
Gikanayon usab sa DPWH nga pinaagi sa maong proyekto, makunhuran ang mga pagbaha sa kadalanan, mapalambo ang road accessibility atol sa grabe nga mga pag-ulan, ug maghatag usab og mas luwas nga pagbyahe sa mga motorist ug sa katawhan. Gisuportahan usab niini ang flood master plan ug ang malungtarong urban development sa dakbayan sa dabaw.
Samtang, na-una na usab nga giduaw ni sec Dizon ang Sitio San Juan Village, Bangkal, Barangay Talomo Proper kagahapon sa buntag human ang grabe nga pagbaha niadtong July 24.
