Gibatikos ni Davao City 1st District Representative Paolo “Pulong” Duterte ang ikalimang State of the Nation Address (SONA) ni Pangulong Ferdinand “Bongbong” Marcos Jr., human niyang giingong kulang ang mga tubag niini sa nagpadayon nga mga isyu sa giingong korapsyon ug sa kalisod nga giatubang sa daghang mga Pilipino. Sumala pa kang Duterte, dili igo ang paghisgot sa Pangulo sa pipila ka mga isyu kon wala kini masabayan sa konkreto ug patas nga aksyon alang sa tanang naapektuhan sa kahimtang sa ekonomiya.
Dugang pa niini, iyang gikwestiyon ang giingong paghatag og dakong pagtagad sa sitwasyon sa kanhi House Speaker Martin Romualdez, samtang, matud pa niya, daghang ordinaryong Pilipino ang nagpadayon sa pag-antos sa pagsaka sa presyo sa mga palaliton, taas nga bayranan sa kuryente, ug nagkagamay nga kantidad sa ilang kita. Lakip sa iyang gibutyag nga gusto sa katawhan nga mapadayag ang tibuok kamatuoran ug mapanubag ang tanang nalambigit sa giingong mga iregularidad, lakip ang mga isyu nga naglambigit sa flood control funds, PhilHealth funds, ug Maharlika Fund.
Matud pa sa kongresista, samtang wala pa matubag ang mga pangutana kabahin sa bilyon-bilyong pondo nga giingong gigamit sa maong mga programa, magpabiling kulang ang SONA sa panan-aw sa daghang mga Pilipino. Gipahayag usab ni duterte nga mas angay hatagan og prayoridad sa gobyerno ang pagsulbad sa nagkataas nga presyo sa mga batakang palaliton, mahal nga bayranan sa kuryente, ubos nga kita sa mga mamumuo, ug padayon nga pagsamot sa kakabos.
Dugang pa niini, iyang giingon nga ang tinuod nga kahimtang sa nasud dili masukod pinaagi sa mga palakpak sulod sa Kongreso, kondili pinaagi sa kahimtang sa panginabuhi sa matag pamilyang Pilipino, kalidad sa serbisyo sa gobyerno, ug pagsalig sa katawhan ngadto sa administrasyon. Kahinumduman, usa sa mga gibutyag ni Pangulong Marcos sa iyang SONA ang kampanya batok sa giingong korapsyon ug ang padayon nga pagpasaka og mga kaso batok sa mga opisyal nga nalambigit sa giingong mga iregularidad sa mga proyekto sa gobyerno.
