Gilimod sa pipila ka mga paryente sa mga missing sabungero ang alegasyon nga gibayaran sila aron usbon ang ilang mga pahayag atol sa ilang pagsumite sa counter-affidavit ngadto sa Department of Justice o DOJ niadtong Biyernes, Hulyo 17. Sumala pa sa igsoon sa usa sa mga nawala nga sabungero, mitunga sila sa preliminary investigation hearing sa DOJ aron ipatin-aw nga wala sila nakig-areglo may kalabotan sa reklamo nga obstruction of justice nga gisang-at sa laing grupo sa mga paryente sa missing sabungeros.
Lakip sa mga complainant si Diane Loyola, ang kapikas sa usa sa mga nawala nga sabungero. Dugang pa niini, una nang nagsumite og counter-affidavit ang abogado sa puganteng negosyante nga si Charlie “Atong” Ang sa maong reklamo, diin giakusahan ang kampo niini nga misuhol kuno sa pipila ka mga paryente sa mga missing sabungeros.
Matod sa usa pa ka paryente nga nagsumite usab og counter-affidavit, miangkon kini nga nakadawat sila og gamay nga tabang, apan giingon niyang gigamit kini batok kanila ug gipasabot nga wala sila nakigkasabot alang sa pag-undang sa kaso. Gipatin-aw sa mga paryente nga wala sila nagpabayad ug wala usab sila nisulod sa bisan unsang kasabutan may kalabotan sa reklamo.
Sa pagkakaron, nagpadayon ang preliminary investigation sa DOJ aron susihon ang mga alegasyon kabahin sa giingong obstruction of justice sa kaso sa pagkawala sa mga sabungero.
