Gipaboran ni kanhi Iloilo 5th District Representative Niel “Junjun” Tupas ang desisyon sa House Prosecution Panel nga dili na ipresentar ang nahibiling mga testigo alang sa Article 4 o Grave Threats sa impeachment trial ni Vice President Sara Duterte. Sumala pa kang Tupas, nga nagsilbing lead prosecutor sa 2012 impeachment trial ni kanhi Article 4 o Grave Threats , husto ang gihimong lakang sa prosekusyon tungod kay sa iyang panan-aw, ang Article 4 mao ang labing huyang nga bahin sa mga Artikulo sa Impeachment.
Dugang pa niya, kung ipadayon pa ang pagpresentar sa dugang mga testigo alang sa maong artikulo, posible lamang kini nga maghatag og higayon sa depensa aron kuwestiyunon ang kalig-on sa kaso batok kang Vice President Sara Duterte. Matod ni Tupas, posibleng gikonsiderar usab sa prosecution panel ang mga panawagan sa pipila ka opisyal nga undangan na ang pagpresentar sa dugang mga saksi alang sa Article 4.
Lakip sa iyang gipahayag ang dili na kinahanglan nga pag-atubang ni National Bureau of Investigation o NBI Director Melvin Matibag sa pagdungog sa Hulyo 20, human napakita na sa duha ka mga saksi gikan sa NBI ang resulta sa imbestigasyon sa ahensya kabahin sa giingong grave threats ni Vice President Sara Duterte batok kang Pangulong Ferdinand Marcos Jr., First Lady Liza Marcos, ug kanhi House Speaker Martin Romualdez. Sa pagkakaron, nagpadayon ang impeachment trial samtang gipaabot ang sunod nga mga lihok sa Senate Impeachment Court kabahin sa maong kaso.
