Wala pay desisyon ang Davao City Transport and Traffic Management Office (DCTTMO) sa bisan unsang pagtaas sa plete sa mga tricycle sa Davao City, busa nagpabilin sa ₱10 ang minimum nga plete alang sa unang upat ka kilometro, uban sa ₱1 nga dugang sa matag mosunod nga kilometro.
Gipahayag ni Dr. Chona Advincula, hepe sa Motorized Vehicle Franchise and Regulatory Division, nga sa kapin 130 ka mga ruta sa tricycle sa siyudad, 24 pa lamang ang nagsumite og petisyon aron ipataas sa ₱20 ang minimum nga plete. Matod niya, wala pa’y nahimong pinal nga desisyon tungod kay gisugdan pa sa DCTTMO ang serye sa public hearing aron paminawon ang mga baruganan sa mga operator, drayber, pasahero, ug uban pang mga apektadong sektor.
Gipasiugda sa buhatan nga ang bisan unsang pagbag-o sa plete pagahimoon lamang human makompleto ang konsultasyon ug masusi ang tanang impormasyon nga may kalabotan sa maong petisyon.
