Gipakusgan sa administrasyon ni U.S. President Donald Trump ang kampanya batok sa International Criminal Court (ICC) pinaagi sa mga lakang nga nagtumong sa pag-isolate ug pagluya sa internasyonal nga hukmanan, tungod sa giingong hulga niini sa soberanya sa Estados Unidos.
Sumala pa kang U.S. Secretary of State Marco Rubio, wala giila sa Estados Unidos ang awtoridad sa ICC sa pag-imbestiga o pagpasaka og kaso batok sa mga Amerikano ug mga opisyal sa ilang gobyerno.
Matod pa niya, gitukod ang ICC aron manubag sa labing grabe nga mga paglapas sa internasyonal nga balaod, apan sa ilang panan-aw, misobra na kini sa iyang mandato ug nahimong mas agresibo sa paggamit sa iyang gahum.
Dugang pa niini, gipasiugda sa administrasyon ni Trump nga dili nila tugotan ang ICC nga mahimong hulga sa mga opisyal ug interes sa Estados Unidos.
Lakip sa gikonsiderang mga lakang sa Washington batok sa ICC ang pagpatuman og travel ban, pagbawi sa visa, pagpalapad sa mga sanctions batok sa korte ug sa mga kaubang organisasyon niini, ingon man ang pagdasig sa ubang mga nasud nga mobulag sa maong internasyonal nga tribunal.
Kahinumduman, dugay nang baruganan sa Estados Unidos, lakip na sa panahon ni kanhi President George W. Bush, nga walay hurisdiksyon ang ICC sa pag-imbestiga ug pag-usig sa mga Amerikanong opisyal ug mga miyembro sa militar.
Sa pagkakaron, wala pa nagpagawas og opisyal nga komento ang ICC bahin sa maong isyu. Sumala kang ICC spokesperson Oriane Maillet, dili pa motubag ang korte sa kasamtangang mga pahayag ug lakang sa administrasyon sa Estados Unidos.
