Padayon gimonitor ni Senador Ronald “Bato” Dela Rosa ang nagpadayon nga impeachment trial ni Vice President Sara Duterte, sumala sa iyang abogado nga si Atty. Israelito Torreon. Sa eksklusibong pakighinabi sa Bombo Radyo, gipadayag ni Torreon nga bisan wala siyay direktang komunikasyon sa senador sa pagkakaron, nakaseguro siya nga padayon kining nagsubay sa mga kalamboan sa pagtaral sa Senado.
Matod pa sa abogado, nagpabilin nga mabinantayon si Dela Rosa tungod sa giingong posibilidad nga ipatuman sa mga awtoridad ang warrant sa iyang pagdakop. Kahinumduman, giatubang sa senador ang warrant of arrest nga may kalabotan sa International Criminal Court (ICC), nga giingong gimando sa Department of Justice (DOJ) nga ipatuman sa mga otoridad.
Dugang pa niini, nagtuo ang kampo ni Dela Rosa nga posible kunong masubli ang nahitabo kang kanhi Pangulong Rodrigo Duterte, nga human madakpan gidiretso sa The Hague, Netherlands. Lakip sa gipasiugda ni Torreon nga nagpadayon ang pagsalig nila sa kahimtang ug katakus sa senador isip miyembro sa impeachment court, apan miusab ang sitwasyon human sa giingong hulga sa iyang pagdakop.
Sa pagkakaron, gipadayag ni Torreon nga posible gihapong motambong si Senador Dela Rosa sa Senado sa angay nga higayon. Apan, naghangyo siya sa publiko nga sabton ang kasamtangang kahimtang sa senador ug ang hinungdan sa iyang padayon nga pagkawala sa mga sesyon sa Senado.
