Gikwestyon sa depensa ang mga petsang nakabutang sa pipila ka dokumentong gisumite sa National Bureau of Investigation (NBI) atol sa ikaupat nga adlaw sa impeachment trial ni Vice President Sara Duterte, nga maoy hinungdan sa mubo nga panaglalis tali sa duha ka panig.
Sumala pa, gipasiugda ni Atty. Mark Vinluan ang giingong kalainan sa mga petsa nga makita sa Investigation Data Form (IDF) nga gisumite sa NBI ngadto sa Department of Justice (DOJ).
Matod pa sa depensa, adunay dokumento nga adunay petsang Pebrero 11, 2025, apan sumala sa rekord, nadawat na kini sa DOJ niadtong Enero 30, 2025, nga mas sayo kaysa sa petsang nakabutang sa maong dokumento. Gihisgutan usab sa depensa ang laing dokumento nga adunay giingong kausaban sa petsa sa pagdawat niini.
Tubag ni NBI Regional Director Atty. Jeremy Lotoc, wala siyay ikahatag nga katin-awan tungod kay dili siya ang personal nga nagsumite o midawat sa maong mga dokumento. Iyang gipatin-aw nga adunay laing personnel nga maoy iyang gisugo sa maong proseso ug gitambagan ang depensa nga sa DOJ mangayo og katin-awan kabahin sa maong isyu. Dugang pa niini, gipangutana usab sa depensa ang petsa sa usa ka affidavit nga giandam sa usa ka ahente sa NBI.
Matod ni Lotoc, ang maong ahente ang mas angay motubag niini tungod kay siya mismo ang naghimo sa affidavit. Gipasiugda usab ni Lotoc nga wala usba ang sulod sa ilang mga affidavit, ug ang gipangayo lamang sa DOJ mao ang dugang nga mga dokumento isip kabahin sa padayon nga imbestigasyon. Samtang, misukol ang House prosecution sa maong linya sa pagpangutana, nga nag-ingon nga wala kini direktang kalabutan sa pangunang isyu nga gihisgutan sa impeachment court.
Sa laing bahin, mipadayon ang depensa sa pag-insistir nga importante nga masayran ug mapatin-aw ang mga kalainan sa mga dokumento aron masiguro ang katin-aw ug transparency sa nagpadayon nga pagtaral.
