Gipangayo sa House prosecution panel ngadto sa Senate impeachment court ang pagpauna sa iskedyul sa testimonya ni National Bureau of Investigation (NBI) Director Melvin Matibag sa nagpadayon nga impeachment trial batok kang Vice President Sara Duterte. Sumala pa sa prosekusyon, gihangyo ni Representative Lorenz Defensor nga ibalhin ang pag-atubang ni Matibag sa witness stand karong Martes, Hulyo 14, inay sa orihinal nga iskedyul nga Miyerkules, Hulyo 15.
Dugang pa niini, nangayo og sayo nga schedule si Matibag tungod sa iyang pag-apil sa Regional Summit on Scam Center Compounds and Transnational Organized Crime sa Bangkok sa Hulyo 21 hangtod 22, aron dili maapektuhan ang dagan sa pagtaral. Lakip sa misupak sa maong pag-usab sa iskedyul ang pipila ka senator-judge nga nagpasidaan nga mahimong dili maayong ehemplo ang kalit nga pag-usab sa iskedyul sa mga testigo.
Matod pa, supak kini sa maong lihok tungod sa posibleng paglapas sa 5-day witness rule sa impeachment court ug sa ilang katungod sa pag-cross examine sa testigo. Sa pagkakaron, gimandoan sa korte ang prosekusyon nga isumite ang sulat ni Matibag ug ang iyang travel authority aron susihon una sa mga senator judge ang hangyo.
Kahinumduman, gilauman nga maghatag og detalye si Matibag kabahin sa opisyal nga imbestigasyon sa NBI sa giingong hulga ni VP Sara Duterte batok kang Pangulong Ferdinand Marcos Jr., First Lady Liza Araneta-Marcos, ug kanhi House Speaker Martin Romualdez.
