Gisupak a Atin Ito Coalition ang bag-ong naratibo nga gipakaylap sa pipila ka Chinese scholars nga nag-angkon nga kabahin kuno sa China ang probinsya sa Batanes, ug giingong walay kamatuoran ang maong pahayag.
Sumala kang Rafaela David, convenor sa Atin Ito Coalition ug presidente sa Akbayan Party, wala na sila matingala sa maong pag-angkon, tungod kay dili na kini unang higayon nga adunay susamang naratibo nga naggikan sa China kabahin sa teritoryo sa Pilipinas.
Matod pa ni David, bag-o lang migawas ang usa ka report gikan sa pipila ka Chinese scholars nga nag-angkon nga ang Batanes sakop kuno sa Taiwan ug, tungod kay giangkon sa China ang Taiwan, ilang giingong kabahin usab sa China ang maong probinsya.
Apan, sa eksklusibong pakighinabi sa Bombo Radyo, gipasiugda ni David nga walay kamatuoran ang maong naratibo ug walay lig-on nga basihanan ang maong pag-angkon.
Dugang pa niini, iyang giingon nga ang Batanes lehitimong bahin sa teritoryo sa Pilipinas ug ang mga pahayag gikan sa China usa lamang ka pamaagi sa pagpalapad sa ilang mga pag-angkon ug pagpamugos batok sa nasud.
Lakip sa mibarog batok sa maong alegasyon si Roberto “Ka Dodoy” Ballon, lider sa mga mangingisda ug co-convenor sa Atin Ito Coalition, nga mipasiugda nga ang Batanes klarong sakop sa Pilipinas.
Matod pa ni Ballon, ang pag-angkon nga kabahin sa China ang Batanes usa lamang ka walay basihanan nga naratibo ug pekeng impormasyon, ilabina kay ang Pilipinas giila sa United Nations Convention on the Law of the Sea (UNCLOS) nga adunay katungod sa iyang mga maritime zones.
Dugang pa niini, nagtuo si Ballon nga ang pagpakaylap sa maong naratibo adunay basbas sa gobyerno sa China, nga iyang giingong adunay impluwensiya sa mga pahayag sa pipila ka mga akademiko ug mga lungsoranon niini.
Sa kasamtangan, nagpadayon ang Atin Ito Coalition sa pag-awhag sa publiko nga magmatngon batok sa mga impormasyon nga walay lig-on nga basihanan ug magpabiling mapanalipdan ang soberanya ug teritoryo sa Pilipinas.
